Um hugt verður eftir føroyska tónleikapallinum kann skjótt staðfestast, at nógv tær flestu tónleikaframførslurnar, sum eru á skránni, verða fyriskipaðar av einstaklingum, av eldsálum, sum, uttan at hugsa um persónligan vinning og status, brúka tíð, orku og til tíðir pening úr egnum lumma, fyri at femja tiltøkini.
Tað er nokk fáur, ið situr og lurtar eftir einari konsert, sum gevur sær far um, hvat fyri arbeiði liggur aftanfyri tað, ið viðkomandi sær og hoyrir. Og í flestu førum, eru tað teir útinnandi tónleikararnir á pallinum, sum hava tikið sær av at skipa fyri úr a til z. Hvør konsert, hvørt tiltak og hvør festivalur er eitt prosjekt, har byrjað verður frá null.
Aldubáran er sera fegin um játtaðan stuðul til tiltøk og konsertir. Seinastu árini, hevur bólkurin fingið stuðul til sítt virksemi frá fyrst og fremst Tórshavn Kommunu og Mentamálaráðnum.
Hesin stuðul verður latin árliga og Aldubáran hevur bundið seg til at framføra føroyskan tónleik og at samstarva við stovnar, har ið dentur verður lagdur á arbeiðið við børn og ung.
Hetta serstakliga við skúlakonsertum, samstarvi við Musikkskúlan og í serstøkum førum, at arbeiða og framføra við framkomnum tónleikanæmingum.
Aldubáran samstarvar regluliga við mentanarstovnar.
